Як гэта працуе

Спачатку важнае. Усе лічбы на BySceneBase — са Spotify і YouTube Music. Калі ў артыста асноўная аўдыторыя на Bandcamp, у VK ці дзесьці яшчэ, тут вы гэтага не ўбачыце: на іншых пляцоўках карціна можа быць зусім іншай. Мы працуем над тым, каб з часам падключыць больш крыніц.

Цяпер — як усё ўладкавана.

Адкуль даныя

З абедзвюх платформаў мы бяром дзве рэчы:

• каталог — артыстаў, іх рэлізы і трэкі: хто што выпусціў і калі;
• метрыкі — падпісчыкаў, штомесячных слухачоў, колькасць праслухоўванняў трэкаў.

Праслухоўванні ёсць не ў кожнага трэка. Гэта абмежаванне саміх платформаў: частку лічбаў яны проста не аддаюць. Таму дзесьці вы ўбачыце пропускі — гэта не памылка.

Што мы з імі робім

Даныя з дзвюх крыніц мы зводзім разам: адзін артыст — адзін профіль, нават калі рэлізы па-рознаму падпісаныя ў Spotify і YouTube Music. Дадаем жанры і геаграфію, звязваем рэлізы з артыстамі, чысцім дублікаты.

На гэтым трымаюцца ўсе раздзелы сайта: радар новых рэлізаў, каталог артыстаў з фільтрамі па жанрах і гарадах, рэйтынгі трэкаў за месяц і год, плэйлісты, графікі на галоўнай.

Тут няма рэдакцыі

Сайт працуе аўтаматычна. Збор даных, топы трэкаў, плэйлісты, парадак у каталогу — усё лічыць алгарытм па адных і тых жа правілах для ўсіх. Мы не можам нікога падняць вышэй, дадаць «па просьбе» ці прыбраць з рэйтынгу. Калі артыст на першым месцы, гэта значыць толькі адно: такія ў яго лічбы.

Як часта абнаўляюцца даныя

З затрымкай, а не ў рэальным часе. Частата залежыць ад таго, наколькі артыст актыўны. Выходзяць новыя рэлізы — даныя абнаўляюцца часта. Апошні рэліз быў дзесяць гадоў таму — чарга даходзіць рэдка.

Таму лічбы на сайце могуць крыху адставаць ад таго, што вы бачыце ў Spotify проста цяпер. Гэта нармальна. А калі трэба абнавіць даныя пра канкрэтнага артыста па-за чаргой — напішыце нам праз форму зваротнай сувязі.

Калі нешта не так

Напішыце. Няправільны горад, чужы рэліз у профілі, пераблытаны жанр, састарэлыя лічбы — усё гэта можна паправіць, і мы будзем удзячныя за сігнал. Форма зваротнай сувязі адкрытая для ўсіх: і для саміх музыкаў, і для слухачоў.

Што далей

Spotify і YouTube Music — гэта старт, а не столь. У планах новыя платформы і глыбейшая статыстыка, каб карціна сцэны станавілася паўнейшай. Калі вам не хапае нейкіх даных — напішыце, ідэі мы чытаем.